తిరుమల నడకదారిలో చిరుత కలకలం

భక్తులు అప్రమత్తంగా ఉండాలని టీటీడీ, అటవీశాఖ విజ్ఞప్తి

తిరుమల, అక్టోబరు 5 (చక్రవాణి డిజిటల్ న్యూస్ ): తిరుమల అలిపిరి కాలినడక మార్గంలో చిరుతపులి సంచారం కలకలం రేపింది. సోమవారం తెల్లవారుజామున మోకాళ్లమిట్ట ప్రాంతంలో మెట్ల మార్గానికి సమీపంలో చిరుత సంచరిస్తున్నట్లు అటవీశాఖ అధికారులు గుర్తించారు.

భక్తుల సంచారం లేకపోవడంతో తప్పిన ప్రమాదం

తెల్లవారుజామున సుమారు 2 గంటల సమయంలో ఈ ఘటన చోటుచేసుకుంది. ఆ సమయంలో నడకమార్గంలో భక్తుల సంచారం లేకపోవడంతో పెద్ద ప్రమాదం తప్పిందని అధికారులు తెలిపారు. అక్కడ ఏర్పాటు చేసిన నిఘా కెమెరాల్లో చిరుత సంచార దృశ్యాలు రికార్డయ్యాయి.

అప్రమత్తంగా ఉండాలని సూచన

ఈ ఘటన నేపథ్యంలో కాలినడకన తిరుమలకు వెళ్లే భక్తులు అప్రమత్తంగా ఉండాలని టీటీడీ, అటవీశాఖ అధికారులు సూచించారు. ముఖ్యంగా రాత్రి, తెల్లవారుజాము వేళల్లో గుంపులుగా ప్రయాణించాలని, చిన్నారుల విషయంలో తల్లిదండ్రులు ప్రత్యేక శ్రద్ధ వహించాలని కోరారు. భద్రతా సిబ్బంది సూచనలను తప్పనిసరిగా పాటించాలని స్పష్టం చేశారు. నడకదారిలో పహారాను మరింత ముమ్మరం చేసినట్లు అధికారులు వెల్లడించారు.