సింగరేణి గర్జన.. కాంగ్రెస్‌పై కేటీఆర్‌ సమరశంఖం!
రూ.60 వేల కోట్ల బకాయిలపై నిలదీత.. అవకతవకలపై సీబీఐ విచారణకు డిమాండ్‌
కార్మికుల హక్కుల కోసం పోరాటం.. మంత్రులు, ఎమ్మెల్యేల ఇళ్ల ముట్టడికి హెచ్చరిక 
గోదావరిఖని, అక్టోబర్ 14 , చక్రవాణి న్యూస్: సింగరేణి కార్మికుల హక్కుల పరిరక్షణే లక్ష్యంగా బీఆర్‌ఎస్‌ ఆధ్వర్యంలో గోదావరిఖనిలో నిర్వహించిన ‘సింగరేణి కార్మిక గర్జన’ బహిరంగ సభలో ఆ పార్టీ వర్కింగ్‌ ప్రెసిడెంట్‌ కేటీఆర్‌ కాంగ్రెస్‌ ప్రభుత్వంపై తీవ్ర ఆరోపణలు చేశారు. సింగరేణి సంస్థ ఆర్థిక పరిస్థితి, కార్మికుల లాభాల వాటా, బొగ్గు ఉత్పత్తి, టెండర్ల వ్యవహారాలపై ప్రభుత్వాన్ని నిలదీశారు. సంస్థలో జరిగినట్లు ఆరోపిస్తున్న అవకతవకలపై సమగ్ర విచారణ జరిపించాలని డిమాండ్‌ చేశారు.
రూ.60 వేల కోట్ల బకాయిలు ఎప్పుడు చెల్లిస్తారు?
రాష్ట్ర ప్రభుత్వం, విద్యుత్‌ సంస్థలు సింగరేణికి చెల్లించాల్సిన బకాయిలు పేరుకుపోయాయని కేటీఆర్‌ ఆరోపించారు. సుమారు రూ.60 వేల కోట్ల బకాయిలను వెంటనే చెల్లించాలని డిమాండ్‌ చేశారు. బీఆర్‌ఎస్‌ పాలనలో కార్మికులకు లాభాల్లో 32 శాతం వాటా అందించామని, ప్రస్తుత కాంగ్రెస్‌ ప్రభుత్వ హయాంలో ఆ వాటా తగ్గిందని విమర్శించారు.
బొగ్గు గల్లంతుపై విచారణ జరపాలి
సింగరేణిలో ఓవర్‌బర్డెన్‌ టెండర్లు, ఓపెన్‌కాస్ట్‌ గనులు, సైట్‌ విజిట్‌ సర్టిఫికెట్ల వ్యవహారాల్లో అక్రమాలు జరుగుతున్నాయని కేటీఆర్‌ ఆరోపించారు. సుమారు 40 లక్షల టన్నుల బొగ్గు గల్లంతైనట్లు పేర్కొంటూ, ఈ వ్యవహారంపై సీబీఐ లేదా సిట్టింగ్‌ జడ్జితో విచారణ జరిపించాలని డిమాండ్‌ చేశారు. సంస్థ లావాదేవీలు, బొగ్గు నిల్వలు, రవాణా వివరాలపై సమగ్ర పరిశీలన జరగాలని కోరారు.
కార్మికుల కోసం ఉద్యమం ఉధృతం
సింగరేణిని ప్రైవేటీకరణ దిశగా తీసుకెళ్లే ప్రయత్నాలను అడ్డుకుంటామని కేటీఆర్‌ స్పష్టం చేశారు. కార్మికుల హక్కులు, లాభాల వాటా, పెండింగ్‌ సమస్యలను పరిష్కరించకపోతే కాంగ్రెస్‌ మంత్రులు, ఎమ్మెల్యేల ఇళ్ల ముట్టడి చేపడతామని హెచ్చరించారు. సింగరేణి పరిరక్షణ కోసం బీఆర్‌ఎస్‌ పోరాటాన్ని మరింత ఉధృతం చేస్తుందని ప్రకటించారు.సింగరేణిలో బొగ్గు గల్లంతు, టెండర్లలో అవకతవకలు, ప్రభుత్వ బకాయిలపై కేటీఆర్‌ తీవ్ర ఆరోపణలు చేశారు. ఈ ఆరోపణలపై సీబీఐ లేదా సిట్టింగ్‌ జడ్జితో విచారణ జరిపించాలని డిమాండ్‌ చేశారు.ఈ సభకు బీఆర్‌ఎస్‌ సీనియర్‌ నాయకులు, మాజీ మంత్రులు టి. హరీశ్‌రావు, కొప్పుల ఈశ్వర్‌, గంగుల కమలాకర్‌, ప్రభుత్వ మాజీ విప్‌, మాజీ ఎమ్మెల్యే బాల్క సుమన్, మంథని మాజీ ఎమ్మెల్యే పుట్ట మధూకర్, రామగుండం మాజీ ఎమ్మెల్యే కోరుకంటి చందర్‌, టీబీజీకేఎస్‌ అధ్యక్షుడు మిర్యాల రాజిరెడ్డి, రాష్ట్ర నాయకులు వ్యాల్ల హరీశ్‌రెడ్డి, కౌశిక్‌ హరి, కోలేటి దామోదర్‌, మూల విజయారెడ్డి తదితరులు హాజరయ్యారు. సింగరేణి కార్మికులు, బీఆర్‌ఎస్‌ శ్రేణులు పెద్ద సంఖ్యలో పాల్గొన్నారు.
