మత్తు రహిత భారతాన్ని నిర్మిద్దాం: భూపాలపల్లి జిల్లా వ్యాప్తంగా అవగాహన సదస్సులు

భూపాలపల్లి ప్రభుత్వ ఉన్నత పాఠశాల (జెడ్పీహెచ్‌ఎస్‌) ఆవరణలో వైద్య ఆరోగ్యశాఖ డిప్యూటీ డీఎంహెచ్‌వో డాక్టర్ దేవేందర్ ఆధ్వర్యంలో ప్రత్యేక సదస్సు జరిగింది. ఈ సందర్భంగా ఆయన మాట్లాడుతూ.. మత్తు పదార్థాల వినియోగం వల్ల విద్యార్థులు శారీరక, మానసిక అనారోగ్య సమస్యల బారిన పడటమే కాకుండా, చదువులో వెనుకబడి తమ ఉజ్వల భవిష్యత్తును చేతులారా నాశనం చేసుకుంటున్నారని ఆవేదన వ్యక్తం చేశారు. ఆరోగ్యకరమైన, చైతన్యవంతమైన, బలమైన యువశక్తిని నిర్మించేందుకు ప్రతి విద్యార్థి మత్తు పదార్థాలకు దూరంగా ఉండాలని సూచించారు. అనంతరం విద్యార్థులతో మత్తు పదార్థాల జోలికి వెళ్లబోమంటూ ఘనంగా ప్రతిజ్ఞ చేయించారు.

సదస్సు అనంతరం పాఠశాల విద్యార్థులు, ఉపాధ్యాయులు కలిసి పట్టణ వీధుల్లో మత్తు పదార్థాల వ్యతిరేక అవగాహన ర్యాలీ నిర్వహించారు. ప్లకార్డులు ప్రదర్శిస్తూ ఆరోగ్యకరమైన జీవన విధానాన్ని అలవర్చుకోవాలని నినాదాలు చేశారు.

ఈ కార్యక్రమంలో స్థానిక వైద్యాధికారి డాక్టర్ రోహిణి, డిస్ట్రిక్ట్ ప్రోగ్రాం కోఆర్డినేటర్ మురళీధర్ రెడ్డి, సుధీర్, ప్రభుత్వ పాఠశాలల ఉపాధ్యాయులు, ఏఎన్‌ఎంలు, ఆశా కార్యకర్తలు మరియు పెద్ద సంఖ్యలో విద్యార్థులు పాల్గొన్నారు.