అంగన్వాడీ కొలువుల్లో స్థానికతపై సందేహాలు

భూపాలపల్లి జిల్లా మహదేవపూర్‌ ఐసీడీఎస్‌ ప్రాజెక్టు పరిధిలోని అంగన్వాడీ పోస్టులకు ఇటీవల నోటిఫికేషన్‌ వెలువడింది. ఈ పోస్టులకు దరఖాస్తు చేసుకున్న అభ్యర్థుల సర్టిఫికెట్ల పరిశీలన ఈ నెల 24న నిర్వహించారు. ఈ నేపథ్యంలో అంగన్వాడీ పోస్టుల ఎంపికలో స్థానికతను ఏ ప్రాతిపదికన నిర్ణయిస్తారో అధికారులు స్పష్టత ఇవ్వాలని అభ్యర్థులు కోరుతున్నారు.ముఖ్యంగా వివాహం అనంతరం భర్త నివసించే ప్రాంతానికి వెళ్లిన మహిళను ఏ ప్రాంతానికి స్థానికురాలిగా పరిగణిస్తారో స్పష్టం చేయాలని ప్రశ్నిస్తున్నారు. అంగన్వాడీ కేంద్రం ఉన్న గ్రామం, వార్డు లేదా ప్రాంతంలో వాస్తవంగా స్థిరనివాసం ఉన్న మహిళలకు అవకాశం కల్పించేలా నిబంధనలు అమలు చేయాలని కోరుతున్నారు. కేవలం ఆధార్‌, ఇతర ధ్రువీకరణ పత్రాల్లోని చిరునామాను మాత్రమే కాకుండా.. అభ్యర్థి వాస్తవంగా అక్కడ నివసిస్తున్నారా? అనే అంశాన్ని కూడా నిబంధనల ప్రకారం పరిశీలించాలని డిమాండ్‌ చేస్తున్నారు.ఉద్యోగం కోసం కొంతకాలంగా మాత్రమే ఒక ప్రాంతంలో నివసిస్తున్న అభ్యర్థుల స్థానికతను ఎలా నిర్ణయిస్తారో అధికారులు స్పష్టంగా వెల్లడించాలని కోరుతున్నారు. స్థానికంగా ఏళ్లుగా నివసిస్తున్న మహిళలకు అన్యాయం జరగకుండా ప్రతి అభ్యర్థి స్థానికతను నిబంధనల ప్రకారం నిర్ధారించాలని విజ్ఞప్తి చేస్తున్నారు.