ఐటీ, వాణిజ్య రంగాల్లో 'తెలంగాణ-విక్టోరియా' దోస్తీ

హైదరాబాద్‌ , జూలై 4 :  తెలంగాణ, ఆస్ట్రేలియాలోని విక్టోరియా రాష్ట్రాల మధ్య వాణిజ్య, సాంకేతిక రంగాల్లో ద్వైపాక్షిక సంబంధాలను మరింత బలోపేతం చేయాలని నిర్ణయించారు. శనివారం హైదరాబాద్‌లోని డా.బీఆర్‌ అంబేడ్కర్‌ సచివాలయంలో రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌ బాబుతో విక్టోరియా శాసనమండలి ప్రభుత్వ విప్‌ లీ టార్లామిస్‌ మర్యాదపూర్వకంగా భేటీ అయ్యారు.

•సరికొత్త సాంకేతికతపై దృష్టి:

ఈ సందర్భంగా ఎమర్జింగ్‌ టెక్నాలజీస్, స్టార్టప్‌ ఎకోసిస్టమ్, విద్య, నైపుణ్యాభివృద్ధి రంగాల్లో కలిసి పనిచేయడంపై ఇరుపక్షాలు సుదీర్ఘంగా చర్చించాయి. వీటితో పాటు అడ్వాన్స్‌డ్‌ మ్యానుఫ్యాక్చరింగ్, గేమింగ్, విజువల్‌ ఎఫెక్ట్స్‌ (VFX), యానిమేషన్, వినోద రంగాల్లో పరస్పర సహకారానికి ఉన్న అవకాశాలపై ప్రత్యేకంగా దృష్టి సారించారు.

•గ్లోబల్‌ ఇన్వెస్ట్‌మెంట్‌ డెస్టినేషన్‌గా తెలంగాణ:

తెలంగాణను అంతర్జాతీయ పెట్టుబడుల గమ్యస్థానంగా (గ్లోబల్‌ ఇన్వెస్ట్‌మెంట్‌ డెస్టినేషన్‌) తీర్చిదిద్దేందుకు ప్రభుత్వం తీసుకుంటున్న చర్యలను మంత్రి శ్రీధర్‌ బాబు విక్టోరియా ప్రతినిధికి వివరించారు. భవిష్యత్తు సవాళ్లను సమర్థంగా ఎదుర్కొనేలా రాష్ట్రంలో పారిశ్రామిక రంగాన్ని ప్రణాళికాబద్ధంగా నవీకరిస్తున్నామని తెలిపారు. తమ ప్రభుత్వం అంతర్జాతీయ భాగస్వామ్యాలకు అత్యంత ప్రాధాన్యమిస్తోందని చెప్తూ.. తెలంగాణలో పెట్టుబడులు పెట్టేలా ఆస్ట్రేలియా స్థానిక పారిశ్రామికవేత్తలను ప్రోత్సహించాలని కోరారు.

•ఆసక్తికరంగా ఉమ్మడి ప్రయాణం:

తెలంగాణ వంటి ప్రగతిశీల రాష్ట్రంతో కలిసి పనిచేసేందుకు తాము ఎంతో ఆసక్తిగా ఉన్నామని లీ టార్లామిస్‌ స్పష్టం చేశారు. పరస్పర సహకారానికి వీలున్న రంగాలను గుర్తించి, త్వరలోనే ఒక సమగ్రమైన రోడ్‌మ్యాప్‌ను సిద్ధం చేసుకుని ముందుకు సాగుతామని ఆయన వెల్లడించారు. ఈ సమావేశంలో రాష్ట్ర ప్రభుత్వ ప్రధాన కార్యదర్శి (CS) సంజయ్ జాజు కూడా పాల్గొన్నారు