కాంగ్రెస్‌ను వీడే ప్రసక్తే లేదు

కాంగ్రెస్ పార్టీని వీడే ప్రసక్తే లేదని మాజీ మంత్రి, వరంగల్ తూర్పు ఎమ్మెల్యే కొండా సురేఖ స్పష్టం చేశారు. పదవులు శాశ్వతం కాదని, కాంగ్రెస్‌లోనే కొనసాగుతా

 ప్రాణం ఉన్నంత వరకు హస్తం పార్టీలోనే.. వరంగల్ తూర్పు నుంచి మళ్లీ పోటీ చేస్తాం

కాంగ్రెస్ పార్టీ నాయకులు, కార్యకర్తల సమావేశంలో 

మాజీ మంత్రి కొండా సురేఖ - ఎమ్మెల్సీ కొండా మురళి 

వరంగల్, సెప్టెంబర్ 13 చక్రవాణి న్యూస్ : కాంగ్రెస్ పార్టీని వీడుతున్నారంటూ జరుగుతున్న ప్రచారానికి మాజీ మంత్రి, వరంగల్ తూర్పు ఎమ్మెల్యే కొండా సురేఖ, మాజీ ఎమ్మెల్సీ కొండా మురళి తెరదించారు. పదవులు శాశ్వతం కాదని, తమకు కాంగ్రెస్ పార్టీతో ఉన్న అనుబంధం మాత్రం కొనసాగుతుందని స్పష్టం చేశారు. ఆదివారం వరంగల్‌లోని ఎంకే నాయుడు హోటల్‌లో తూర్పు నియోజకవర్గ కాంగ్రెస్ కార్యకర్తలు, నాయకులతో కొండా దంపతులు సమావేశమయ్యారు.

పదవుల కంటే పార్టీనే ముఖ్యం

మాజీ ఎమ్మెల్సీ కొండా మురళి మాట్లాడుతూ.. కొండా దంపతులు కాంగ్రెస్ పార్టీని వీడే ప్రసక్తే లేదని స్పష్టం చేశారు. రాహుల్ గాంధీని ప్రధానమంత్రిని చేయడమే తమ రాజకీయ లక్ష్యమని తెలిపారు. పదవులు వస్తుంటాయని, పోతుంటాయని.. అయితే పార్టీ పట్ల, తమను నమ్ముకున్న కార్యకర్తల పట్ల కృతజ్ఞత ఎప్పటికీ ఉంటుందని అన్నారు.తూర్పు నియోజకవర్గంలో పార్టీని మరింత బలోపేతం చేసి రాబోయే కార్పొరేషన్ ఎన్నికల్లో 24 మంది కార్పొరేటర్లను గెలిపించేందుకు కృషి చేస్తామని చెప్పారు. కష్టపడి పనిచేసే కార్యకర్తలకు, నాయకులకు ప్రాధాన్యం ఉంటుందని తెలిపారు. తమను నమ్ముకున్న నాయకులు, కార్యకర్తలు ఎంతోమంది ఉన్నారని.. అందరినీ కలుపుకొని ముందుకు సాగుతామని అన్నారు.

కార్యకర్తలే మా బలం

కాంగ్రెస్ కార్యకర్తలను కంటికి రెప్పలా కాపాడుకుంటామని కొండా మురళి పేర్కొన్నారు. కార్యకర్తలే కొండా దంపతుల అసలైన బలమని చెప్పారు. తనపై జరిగిన దాడిలో శరీరంలో ఇంకా నాలుగు బుల్లెట్లు ఉన్నాయని, కార్యకర్తలు, ప్రజల ఆశీస్సులే తనను ఇంతకాలం నిలబెట్టాయని భావోద్వేగంగా తెలిపారు.

మంత్రి పదవి అలంకారం మాత్రమే

మాజీ మంత్రి కొండా సురేఖ మాట్లాడుతూ.. మంత్రి పదవి కోల్పోయిన నేపథ్యంలో తాము కాంగ్రెస్ పార్టీని వీడుతారంటూ జరుగుతున్న ప్రచారాన్ని ఖండించారు. పదవి అనేది కేవలం అలంకారం మాత్రమేనని, పదవి ఉన్నా లేకపోయినా ప్రజల మధ్యే ఉంటామని అన్నారు.కాంగ్రెస్ అధిష్ఠానం నుంచి తనకు ఫోన్లు వచ్చాయని, పార్టీని వీడకుండా కాంగ్రెస్‌లోనే కొనసాగాలని సూచించినట్లు తెలిపారు. తాము పార్టీ మారే ఆలోచనలో లేమని స్పష్టం చేశారు. పదవి కోల్పోవడం తనకు బాధ కలిగించలేదని, అయితే సరైన కారణం లేకుండా పదవి నుంచి తొలగించడం బాధించిందని పేర్కొన్నారు.

తూర్పు నియోజకవర్గమే మా రాజకీయ క్షేత్రం

వరంగల్ తూర్పు నియోజకవర్గంలోనే కొనసాగుతామని కొండా సురేఖ స్పష్టం చేశారు. డీలిమిటేషన్‌లో మార్పులు వస్తే పరిస్థితులు మారవచ్చని, లేకపోతే తూర్పు నియోజకవర్గం నుంచే మరోసారి కాంగ్రెస్ అభ్యర్థిగా పోటీ చేసి గెలుస్తానని ధీమా వ్యక్తం చేశారు.తమ కుటుంబ రాజకీయాల్లో కొండా దంపతులు ఒక వైపు, తమ కుమార్తె మరో వైపు అని స్పష్టం చేశారు. తాను ఎప్పుడూ పార్టీ హద్దులు దాటి వ్యవహరించలేదని పేర్కొన్నారు.

అసమ్మతి అంశంపైనా స్పందన

గ్రేటర్ వరంగల్ రాజకీయాల్లో నెలకొన్న విభేదాలపై కూడా కొండా దంపతులు స్పందించారు. గుండు సుధారాణిపై అసమ్మతి వ్యక్తం చేయాలని భావించిన సమయంలో ఆమె వచ్చి కొండా మురళిని కలిసి గౌరవం చూపడంతో ఆ అంశాన్ని అక్కడితో వదిలేశామని తెలిపారు.

ఎమ్మెల్సీ సారయ్యకు కూడా తమ అనుచరుల బలాన్ని ప్రత్యక్షంగా చూపిస్తామని సవాల్ చేశారు.

విలువలతో కూడిన రాజకీయాలే మా విధానం

తాము ఎప్పుడూ వ్యక్తిగత రాజకీయాలకు ప్రాధాన్యం ఇవ్వలేదని కొండా సురేఖ అన్నారు. కాంగ్రెస్ పార్టీకి కట్టుబడి విలువలతో కూడిన రాజకీయాలు చేశామని తెలిపారు. కొందరు ఉద్దేశపూర్వకంగా తమపై ఆరోపణలు చేస్తున్నారని విమర్శించారు. తమపై మాట్లాడే నాయకులు ఆచితూచి మాట్లాడాలని హెచ్చరించారు.

కార్పొరేషన్ ఎన్నికలే లక్ష్యం

రాబోయే గ్రేటర్ వరంగల్ కార్పొరేషన్ ఎన్నికల్లో కాంగ్రెస్ పార్టీ బలాన్ని చాటాలని కార్యకర్తలకు కొండా సురేఖ పిలుపునిచ్చారు. తూర్పు నియోజకవర్గంలో 24 సీట్లు గెలుచుకునేలా ప్రతి కార్యకర్త సమన్వయంతో పనిచేయాలని సూచించారు. బీసీలకు రాజకీయంగా, సామాజికంగా మరింత ప్రాధాన్యం కల్పించడమే కాంగ్రెస్ ప్రభుత్వ లక్ష్యమని పేర్కొన్నారు. ఈ క్రమంలో కొండా మురళికి చైర్మన్ పదవి దక్కే అవకాశం ఉందని తెలిపారు.ఈ సమావేశంలో తూర్పు నియోజకవర్గ నాయకులు గోపాల నవీన్ రాజ్, జిల్లా గ్రంథాలయ చైర్మన్ మీసాల ప్రకాష్, వీరగోని రాజ్ కుమార్, మేడిది మధు, మాజీ కార్పొరేటర్లు, మాజీ నాయకులు, కార్యకర్తలు పాల్గొన్నారు.

మీ చక్రవాణి న్యూస్

అన్యాయంపై అక్షర సమరం – అవినీతిపై సుదర్శన చక్రం

నిరంతరం తాజా వార్తలు